രാജ്യത്തെ പരമോന്നത കായിക ബഹുമതിയായ മേജര്‍ ധ്യാന്‍ചന്ദ് ഖേല്രത്ന പുരസ്‌കാരം പ്രഖ്യാപിച്ചു. ഇന്ത്യയുടെ മലയാളി ഹോക്കി താരം ഒളിമ്പ്യന്‍ പി ആര്‍ ശ്രീജേഷ്, ഒളിമ്പിക്‌സ് സ്വര്‍ണമെഡല്‍ ജേതാവ് നീരജ് ചോപ്ര അടക്കം 12 പേര്‍ക്കാണ് പുരസ്‌കാരം. ഈ മാസം 13-നു രാഷ്ട്രപതി ഭവനില്‍ നടക്കുന്ന ചടങ്ങില്‍ പുരസ്‌കാരങ്ങള്‍ സമ്മാനിക്കും.
സുനില്‍ ഛേത്രി ഖേല്‍രത്‌നയ്ക്ക് അര്‍ഹനാകുന്ന ആദ്യ പുരുഷ ഫുട്‌ബോള്‍ താരമായപ്പോള്‍ മിതാലി രാജ് ആദ്യ വനിതാ ക്രിക്കറ്ററായി. ഹോക്കി താരം മന്‍പ്രീത് സിങ്, പാരലിമ്പ്യന്‍മാരായ അവാനി ലേഖര, സുമിത് അന്റില്‍, പ്രമോദ് ഭഗത്, കൃഷ്ണ നഗര്‍, മനീഷ് നര്‍വാള്‍ എന്നിവരും അവാര്‍ഡ് ജേതാക്കളായി.ടോക്യോ ഒളിമ്പിക്‌സില്‍ ഇന്ത്യ വെങ്കല മെഡല്‍ നേടുന്നതിന് മുഖ്യ പങ്കുവഹിച്ച ശ്രീജേഷാണ് ഖേല്രത്ന പുരസ്‌കാരം നേടുന്ന ആദ്യ മലയാളി പുരുഷ താരം.
വിഖ്യാത അത്ലറ്റിക്സ് പരിശീലകന്‍ ടി.പി. ഔസേഫിന് ഇന്ത്യന്‍ അത്ലറ്റിക്സ് രംഗത്തിനു നല്‍കിയ ആജീവനാന്ത സംഭാവനകള്‍ക്ക് ദ്രോണാചാര്യ നല്‍കി ആദരിച്ചപ്പോള്‍ ഈ വര്‍ഷത്തെ പരിശീലന മികവില്‍ പി. രാധാകൃഷ്ണന്‍ നായരും(അത്ലറ്റിക്സ്) പുരസ്‌കാരത്തിന് അര്‍ഹനായി.
