ഗോള്‍വേ :ഗോള്‍വേ ലോണ്‍ ടെന്നിസ് ക്ലബ്ബില്‍ വെച്ച് നടന്ന എഫ്എസ് ഫോഴ്‌സ അണ്ടര്‍ 17, അണ്ടര്‍ 13 ബാഡ്മിൻറൺ ചാമ്പ്യന്‍ഷിപ്പുകളില്‍ മലയാളി കുരുന്നുകള്‍ക്ക് മിന്നും വിജയം.രണ്ട് വ്യത്യസ്ത ചാമ്പ്യന്‍ഷിപ്പുകളില്‍ സഹോദരങ്ങളാണ് ഐറിഷ് ചാമ്പ്യന്മാരായത് എന്നത് അയര്‍ലണ്ടിലെ കായികവേദിയിലും ചരിത്രമായി.
ഡബ്ലിനില്‍ ഗ്ലാസ്നേവനിലെ താമസക്കാരനും ഐറിഷ് ഡിഫന്‍സ് ഫോഴ്സിലെ സിവിലിയന്‍ സ്റ്റാഫുമായ ചേര്‍ത്തല സ്വദേശി ഷോച്ചന്‍ ആന്‍ഡ്രുസിൻറെയും,കാപ്പാ ഹോസ്പിറ്റലിലെ സ്റ്റാഫ് നഴ്‌സ് ബെറ്റ്‌സിയുടെയും മക്കളായ മിഷേല്‍ ഷോച്ചനും ,ഹാന ഷോച്ചനുമാണ് മലയാളികള്‍ക്ക് അഭിമാനനേട്ടം സമ്മാനിച്ചത്.
ഈ വര്‍ഷത്തെ ജുവനൈല്‍ സര്‍ക്യൂട്ട് മത്സരങ്ങള്‍ അവസാനിച്ചപ്പോള്‍ നാഷണല്‍ എലൈറ്റ് ടീമിലേക്ക് തിരഞ്ഞെടുക്കപ്പെട്ടവരില്‍ മിഷേലും ഉള്‍പ്പെടുന്നു.യൂറോപ്യന്‍ അന്താരാഷ്ട്ര മത്സരങ്ങളില്‍ സര്‍ക്കാര്‍ ചിലവില്‍ പങ്കെടുക്കാന്‍ എലൈറ്റ് ഗ്രൂപ്പില്‍ ഉള്‍പ്പെടെണ്ടതുണ്ട്. ഇതിനകം തന്നെ നിരവധി യൂറോപ്യന്‍ മത്സരങ്ങളില്‍ പങ്കെടുത്ത് അയര്‍ലണ്ടിനെ വിജയിപ്പിച്ച മിഷേലിൻറെ അര്‍ഹതയ്ക്കുള്ള അംഗീകാരമായി പുതിയ അംഗീകാരത്തെ കണക്കാക്കാം .
